Со овие измени не е предвиден ниту еден нов објект, но затоа се собрани и официјализирани сите спорни зданија предвидени со претходните планови

ОПШТИНА ЦЕНТАР КРЧКА нови измени на ДУП за „Малиот ринг“

Се крчка ли уште една измена на деталниот урбанистички план за“Малиот ринг“. За нацрт-верзијата на планот денес треба да се изјаснат по којзнае кој пат советниците од општината Центар. Со овие измени, сега за сега, нема ниту еден нов објект, но можно е, како што беше случај претходно, и овој пат да излезе некое ново „објектче“, тркало или што уште не од „Скопје 2014“.

Јован Тагасовски, координатор на советничката група на СДСМ во општината, вели дека авторите на оваа последна нацрт-верзија воопшто не дошле да го презентираат планот на вчерашната седница на комисијата на урбанизам, па затоа СДСМ бара планот да не е точка од дневниот ред на денешната седница.

- Повеќе не знам што да кажам за „Малиот ринг“. Со овие измени не е предвиден ниту еден нов објект, но затоа се собрани и официјализирани сите спорни зданија предвидени со претходните планови. Ќе побараме денес да не се расправа за овој план. Власта не може да си ги исполнува своите желби и да расправа само за тоа што таа смета дека треба да се гради на плоштадот „Македонија“. Па ова не е нивни плоштад, ниту „Малиот ринг“ е само нивен, овој простор е на целата држава. Јас лично ќе предложам да се изгради и еден ѕид на срамот и на него да се најдат имињата на сите што ќе гласаат за овој план - категоричен е Тагасовски.

Во изминативе три години, од моментот кога во јануари 2008 година, премиерот Никола Груевски посака да се изгради црква на плоштадот „Македонија“ досега се направени безмалку шест измени на овој детален урбанистички план. По само два месеца од посаканото се направи и новиот ДУП за „Малиот ринг“ со маркичка за црквата, но и за триесетина споменици, Мостот на уметноста и „Око“, новите згради на Уставниот суд, Државниот архив и Археолошкиот музеј, МНР, фонтаните во Вардар, два портала на улицата Македонија. Значајно беше и тоа што максимално дозволената висина се зголеми од 21 на 29 метри.

Летото 2008 година се случи уште една измена, со која се проектираше подземната улица под кејот, сервисна сообраќајница за потребите на зградата на „Дивелоп“ или поранешна Народна банка, како и надградби на Домот на АРМ и ТЦЦ „Плаза“. Но списокот не завршува тука. Истава верзија донесе и дополнителни подземни паркиралишта под паркот „Жена-борец“ и кај „Палома Бјанка“. Една година подоцна, во август 2009 година, е направена и третата измена, во која во центарот се вметна 20-метарски обелиск спроти Собранието, две подземни сообраќајници, дури пет катни гаражи, колонада, уште една кружна зграда кај МОБ и деловен објект. Четвртата измена уследи за осумметарските столбови на левиот брег на Вардар, во форма на отворен амфитеатар, односно колонадата. Петти пат ДУП се менуваше за триумфалната порта, барокната катна гаража кај МЕПСО и скулптурите на мостот „Око“. И сé така тајно, скришно, без почитување на процедурите, постапките, законите. Поради тоа што последните измени на ДУП „Мал ринг“ беа донесени по скратена постапка, планот процедурално падна на Уставен суд. Ова беше нов поттик за надлежните од општината Центар, кои повторувајќи ги сите фази потребни за донесување еден урбанистички план, минатото лето во шестата по ред верзија си вградија уште една маркичка за панорамско тркало на кејот.

- Првата верзија на деталниот урбанистички план „Мал ринг“ е донесена во 1997 година, а досега се направени само три измени на планот во 2007, 2009 и 2010 година - кратко објасни портпаролот на општината Центар, Јовица Ацковски.