Возен парк (ЈСП - двокатни автобуси)

ОДБИЕНА ЖАЛБАТА НА БУГАРСКАТА КОМПАНИЈА КИНГ ЛОНГ

Потпишан договорот за набавка на двокатни автобуси

http://www.utrinski.com.mk/?ItemID=537643CF99EC8F47886DC87A9DE1FD48

ГУАНГМИН ЗАНГ, ГЕНЕРАЛЕН ДИРЕКТОР НА „ЏЕНГЏОУ ЈУТОНГ“ ОД КИНА

Со автобусите за Скопје во поход на ЕУ

Кинеската компанија „Џенгџоу јутонг“ до 2013 година треба да ни испорача 202 двокатни автобуса со уникатен ретро-изглед, за што државата ќе и' плати 35 милиони евра. Еден двокатен затворен автобус од кинеско производство ќе чини 175.000 евра, а двете отворени возила за туристичко разгледување - 310.000 евра. Првите двокатни автобуси скопјани ќе ги видат дури во октомври наредната година, кога ќе бидат испорачани 66 вакви возила, а по 68 возила ќе бидат испорачувани во двете наредни години.

За квалитетот на возилата и за капацитетите на кинеската фабрика разговаравме со Гуангмин Занг, генерален директор на „Џенгџоу јутонг“, која е една од најголемите фабрики за производство на автобуси во светот, со годишно производство во 2009 година од над 30.000 автобуси и со капацитет од 150 возила дневно.

Како ќе гарантирате за квалитетот на автобусите што ќе ги произведете за Скопје, кој е најважен за граѓаните, имајќи предвид дека станува збор за уникатни возила?

- Се согласувам дека најбитно е да им овозможиме на вашите граѓани да се чувствуваат безбедно и комфорно во новиот градски превоз. Компанијата „Јутонг“ досега има произведено голем број двокатни автобуси и нивните шасии се исти. Единствената разлика е во дизајнот и изгледот на предниот дел. Во нивната изработка применуваме неколку методи, кои се клучни за висококвалитетен краен продукт. Го применуваме најсовремениот систем за контролата на квалитетот според ИСО-стандардите. Го поседуваме најнапредниот системски дизајн, како и високостручни инженери што работат на дизајнот и на безбедноста на автобусите. Секој дел од автобусот е тестиран и центриран за да бидеме сигурни дека ги задоволуваме ригорозните европски технички стандарди. Во новите возила ќе бидат вградени каминс-мотори, произведени во Англија, ЗФ-менувачи, оски и управувачи, произведени во Германија. Нашата компанија, покрај лабораториските тестови, има посебен центар за тестирање што ги симулира вистинските состојби на патиштата, со цел да ги тестираме шасиите, системот, како и комплетниот производ, за да бидеме сигурни во квалитетот и во безбедноста.

Колку поскапо ќе не' чини тоа што ќе ни изработите уникатни автобуси, односно што ќе има една таква производствена линија само за Скопје?

- „Јутонг“ е компанија која има над 100 различни линии на производство. Самиот факт дека станува збор за производство на поголема количина на автобуси значи дека ќе имаме пониска цена за единица автобус. Нашиот производствен процес е флексибилен и приспособлив, така што и самото производство на ретро-автобусите ќе биде во рамките на нашите просечни цени. Цената би можело да бидат незначително повисока во споредба со цената на слични автобуси што се возат во Азија, бидејќи ќе треба да се дистрибуираат на подалечна релација. Ќе бидат поевтини од оние што ги произведуваат западноевропските земји, а сигурно ќе имаат еднаков квалитет.

Македонија е само прва точка на влезот на „Јутонг“ на европскиот пазар, што значи дека сакаме да оставиме впечаток на сериозна и квалитетна компанија, која произведува врвни автобуси. Ако се задоволни граѓаните на Скопје, како и Владата на Република Македонија, тоа би било одлична референца за останатите европски земји. Тоа подразбира дека сакаме да обезбедиме висок квалитет за нормална цена.

Дури и најпознатите светски производители на автобуси се скептици за безбедноста на патниците во двокатните возила. И наши стручњаци се сомневаат дека ако се стои на горниот кат, што инаку е непожелно, автобусот може да се преврти. Со што ќе не' убедите дека тоа нема да се случи со вашите возила?

- Во нашето досегашно искуство немаме случај кој би ги потврдил овие стравувања. Доколку ги земеме за пример Лондон и Хонг Конг, кои користат двокатни автобуси, ќе видиме дека досега немале инцидент како тој што го споменавте. Затоа може да кажеме дека овие тврдења се само претпоставки, кои не се базираат на докази и на реални ситуации.

На кој начин ќе биде организирано сервисирањето на возилата? Ќе имате ли сервисен центар во Скопје?

- Сега работиме токму на оваа тема за да изнајдеме соодветни решенија, кои беа побарани од нас на тендерот. Треба да одговориме соодветно на нашите обврски и услуги по продажбата и да најдеме решенија за резервните делови што би биле потребни во иднина.

Од еколошки аспект, колку овие автобуси ќе влијаат на загадувањето на воздухот?

- Еколошките стандарди се основа на нашата компанија и нивното почитување се однесува на целокупниот процес на производство. Моторот што ќе го користат новите автобуси е евро 5. Овие мотори како стандард се усвоени од западна Европа и веруваме дека со нив воздухот ќе биде помалку загаден, бидејќи тие се многу поеколошки од сегашните. 

Каде се' се возат вашите автобуси?

- Во светот се возат повеќе од 200.000 автобуси на „Јутонг“. Тие сообраќаат по високите планини во Тибет, на минус 50 степени во северните делови и на плус 45 степени на југот од Кина, потоа во бразилските дождовни шуми, во зимскиот Сибир, во топлата Куба, во африканските савани - секаде функционираат одлично.

Ние држиме 25 проценти од пазарот во Кина, каде што функционираат повеќе од 300 компании за производство на автобуси.

Анела Петрова