Емилија Стефанова

Акцизите за увоз на автомобили ќе се намалат, со што се очекува намалување на цената на новите и на половните автомобили. Во Министерството за финансии потврдуваат дека прават анализи за можното намалување. Во моментов, македонските граѓани при увоз на автомобили плаќаат многу повеќе давачки во споредба со државите во регионот.
- Во Министерството за финансии се прават анализи за намалување на акцизите при увоз на автомобили, а доколку се утврди дека постои ваква можност дополнително ќе се утврди колку ќе изнесува намалувањето. Во следните две недели, официјално ќе се изјасниме во врска со ова прашање - рече Ивана Билбиловска, портпаролката на Министерството за финансии.
Ваквата најава ги револтираше увозниците на нови возила, кои ја исклучуваат можноста за намалување на акцизите. Златко Калеников, претседателот на Групацијата на увозниците, вели дека вакви анализи се правеле пред две години и порано, и не резултирале со измени. - Министерството за финансии може да добие тужба за изнесување шпекулации за намалување на давачките. На пример, доколку некој шпекулира дека цената на становите ќе се намали по еден месец, логично е дека во текот на тој месец никој нема да купува станови - револтирано вели Златко Калеников, претседателпт на Групацијата на увозници на нови возила.
Тој вели дека може само да се промени начинот на пресметување на акцизите, па место цената да ја определува зафатнината на моторот, таа да се утврдува врз основа на цената при купување, односно моќта на моторот, изразена со коњски сили.
- Во овој случај, ќе настапи прегрупирање на возилата, па можно е некои од нив да поевтинат, а други да поскапат - вели Калеников.
Во моментов, при увоз на автомобили, независно дали се стари или нови, висината на акцизите што ја плаќаат увозниците зависи од зафатнината на моторот, а цените се движат од 250 евра, па нагоре. За автомобилите од најниската класа, кои имаат зафатнина на моторот помала од 1.000 кубни сантиметри, не се плаќаат акцизи при увоз. Автомобилите со зафатнина од 1.000 до 1.500 кубни сантиметри се најбарани на домашниот пазар, а за нивни увоз, увозниците плаќаат по 250 евра акцизи. За увоз на полуксузните автомобили со моќност поголема од 1.500 кубни сантиметри увозниците плаќаат по 1.500 евра, а љубителите на теренски возила, со постојниот ценовник, само за акцизи треба да одделат од 2.500 евра нагоре.
Увозниците на половни автомобили велат дека освен акцизите, плаќаат и големи трошоци при увозот на возилата и дека тоа многу влијае на конечната цена што ја плаќа купувачот.
- За увоз на возило БМВ со моќност на моторот од 2.500 кубни сантиметри од Германија во Бугарија, се плаќа 100 евра за екотакса, при што се прават анализи за исправноста на возилото, и 80 евра за регистрација, таблички, зелена карта и за осигурување - раскажува Љупчо Трајковски, увозник на половни автомобили.
За споредба, за увоз на овој поволен автомобил во државава треба да се платат околу 4.000 евра за акцизи, царина и ДДВ, а на овие трошоци се надоврзуваат и 300 евра за хомологација, шпедиција, А- тест и други придружни трошоци. Потоа, новиот сопственик треба да одвои дополнителни 200 евра за регистрација и за осигурување на возилото, а за зелен картон уште најмалку 50 евра. За еден ист автомобил при увоз во Бугарија се плаќаат 180 евра, а кај нас 4.500 евра, што ја објаснува моментно високата цена на возила во државава.

Нема увоз од САД

Возилата произведени во САД не може да бидат увезени во државава бидејќи не ги исполнуваат стандардите за квалитет на возилата пропишани од ЕУ, а кои се прифатени од нашите институции, објаснуваат увозниците.
- Стандардите за хомологација во Европа се поинакви од тие во САД, што не значи дека американските автомобили се помалку квалитетни, туку напротив, таму се произведуваат побезбедни автомобили - велат стручњаците.
Американските автомобили не може да бидат регистрирани во државава, а Македонците со американски пасош можат да ги донесат овде и да ги возат, но со американски таблички. Транспортот на овие возила трае од 20 дена до еден месец и е по воден пат, а тие што ќе си го дозволат овој луксуз треба од одделат најмалку 2.000 долари.


ВМРО-ДПМНЕ: Нема опасност за екологијата

Увозот на стари возила нема да има негативен еколошки ефект, проценува ВМРО -ДПМНЕ. 
- Од 300.000 возила во Македонија, 100.000 имаат европски стандард Евро нула, а доколку се овозможи увоз како што предлага Владата, ќе е возат возила со стандард Евро два и Евро три – вели пратеникот Влатко Ѓорчев. 
Според негови сознанија, „форд фокус“ од 2000 година во Германија чини 1.500 евра, во Бугарија 2.500 евра, а во Македонија од 5.000 до 6.000 евра. Ова, според ВМРО ДПМНЕ, ќе ги поттикне граѓаните да ги заменат старите возила и да возат нови и побезбедни.