Скопски сообраќај (општо)

Што користат скопјани за превоз за да стигнат до работа, автомобил, автобус или такси, и по која релација најчесто се движат, се дел од прашањата на кои граѓаните ќе треба да одговараат во наредните три недели. Анкетата, која ја побарало Министерството за транспорт и врски, ќе ја спроведува овластена агенција „Рејтинг“. Резултатите од неа ќе послужат за да се направи сообраќајна студија за Градот, со идејни проекти за булеварот Св. Климент Охридски и подземната сообраќајница од Соборниот храм до Народна банка, која треба да ја изработи шпанската фирма „Идом ингенерија и консулторија“, избрана на тендер ова лето. Студијата треба да помогне да се направи компјутерски модел на сообраќајот во Скопје, а во втората фаза да се дадат решенија како би можеле да се проектираат главните артерии. - Анкетата се прави затоа што сеопфатна сообраќајна студија за Скопје не била изработена во последните 20-30 години. Во првите шест месеци ќе се собираат сите можни податоци за сообраќајот во Скопје. Тоа вклучува фреквенција на линии и број на патници во ЈСП, статистички податоци за превезени патници со такси, информации од Агенцијата за регионални и магистрални патишта за протек на возила од четирите влезови во Скопје - вели Горан Арнаудовски, управител на фирмата „Џонсон и Филипс“, која е овластен претставник во земјава на шпанската „Идом“. На овие податоци ќе се надоврзат и одговорите од 3.200 анкетирани семејства, односно вкупно 11.000 испитаници. - Ваквите студии се максимално корисни затоа што утре ќе им помогнат на градските власти во решавањето на сообраќајните проблеми или можеби ќе им укажат на неопходноста од воведување алтернативен превоз, како трамвај или тролејбус. Покрај другото, студијата ќе даде информација и каде и какви паркинзи треба да се градат - вели Арнаудовски. Ангажираните лица од „Рејтинг“, кои со себе ќе носат и легитимации, ќе ги посетат анкетираат граѓаните во нивните домови, во периодот од 17 до 21 часот. Студијата ќе ги опфати сите десет скопски општини и треба да биде готова до 2010 година.

Р.П.

ЈП УЛИЦИ И ПАТИШТА

Реконструиран патот од Средно Водно до манастирот Св. Пантелемон

Екипите на ЈП "Улици и патишта" деновиве целосно ја завршија реконструкцијата на патот од Средно Водно до манастирот "Свети Пантелејмон". Обновата на патот опфати машинско гребење оштетен асфалт на длабочина од 3 до 5 сантиметри и на површина од 2.587 квадратни метри, целосно раскопување за целосна реконструкција на оштетената асфалтна површина од 415 квадратни метри, асфалтирање со дебелина од 4 сантиметри со асфалтна маса АБ 11 на површина од 2.587 квадратни метри. Беа поставени армирано-бетонски цевки Ф 400 во должина од 12 метри за одвод на атмосферската вода.

Работните активности беа изведени од страна на две екипи на ЈП "Улици и патишта". Едната екипа извршуваше машинско гребење на оштетените асфалтни површини, а другата екипа ги санираше ударните дупки. Вкупно беа асфалтирани 4.438 квадратни метри, а реконструкцијата со прекини поради лошите временски услови траеше два месеци. Реконструкцијата на патот Средно Водно - манастир "Свети Пантелејмон" изнесува околу четири милиони денари, а финансиските средства целосно ги обезбеди Градот Скопје.

Пат Визбегово - Шуто Оризари

Жителите од Дебар Маало бараат Општина Центар и Градот конечно да го спроведат она што го најавуваат со години и да воведат еднонасочно движење на возилата по сервисните улици во оваа населба. Целта на нивното барање е, како што велат, да може нормално да се движат по улиците и по тротоарите, зашто моментно таму владее неподнослив метеж.

Откако на неколку поголеми улици во Дебар Маало беше воведено зонското паркирање, граѓаните ги паркираат автомобилите на тротоарите и на коловозите во потесните улички, каде што е бесплатно, но и незаконско. Секојдневната слика во оваа населба говори дека повеќето возачи немаат волја за плаќање зонското паркирање.

- Најлесно им е автомобилот да си го остават на тротоарите во тесните улици или на самите коловози. Улиците и онака се тесни и не може да го поднесат овој метеж. Не може да се разминат две возила на улица, а за нормално и безбедно движење на пешаците може само да сонуваме. Возилата секојдневно се закрчени во уличките поради големиот сообраќаен хаос што го создаваат посетителите на кафулињата. Неретко се случуваат и жестоки караници поради инаетот на возачите кој кого да пропушти - револтирано велат жителите од Дебар Маало.

Од Градот објаснуваат дека проектот за зонско паркирање во центарот на градот е поддржан со задолжително воведување еднонасочен сообраќај по малите сервисни улички.

- Општина Центар треба да изработи сообраќајна документација за детализирање на сообраќајната структура за Дебар Маало 1 и Дебар Маало 2, како и за Буњаковец. По изработката на неопходната документација, Секторот за сообраќај на Град Скопје ќе ги изработи останатите документи за воведување на еднонасочен сообраќај во Дебар Маало - изјавија од одделението за односи со јавност.

Од Општина Центар пак велат дека до нив не била доставена иницијатива за воведување еднонасочен сообраќај од жителите. Но, и покрај тоа, како што велат, се подготвени да го решат метежот во Дебар Маало заедно со Градот.

- Општина Центар е подготвена стручно да ја разгледа таквата иницијатива и да предложи до Град Скопје да се најде решение за сообраќајниот проблем во Дебар Маало и во Буњаковец. Во општината постои желба за решавање на сообраќајниот метеж во овие и во други населби, со цел да им излеземе во пресрет на граѓаните - изјави портпаролот на Центар, Јовица Ацковски.

За воведување еднонасочен сообраќај во овие населби локалните власти зборуваат уште од 2004 година, од времето кога еднонасочно движење на возилата беше воведено во уличките во Карпош 4. Општинските власти од Центар и од Градот Скопје уште тогаш беа свесни дека е потребно пренасочување на сообраќајот во центарот, за да се овозможи нормално движење на возилата и на пешаците. Беше најавено дека еднонасочен ќе се воведе на улиците Орце Николов, 29 Ноември и на улицата која води до Владата. Интересно е и што во тоа време не се планираше сечење на дрворедот на „Илинденска“ и нејзино проширување во делот од Владата до фонтаната Лотосов цвет во паркот. Напротив, овој потег беше планирано да остане ист, а на него да се воведе еднонасочен сообраќај. Проширувањето на „Илинденска“ беше планирано да биде во делот од фонтаната до булеварот Октомвриска револуција во Карпош 3.

http://dnevnik.com.mk/?ItemID=B61E888F971B7F4095CA02F61B99D7AC