Доградба на НУБ

ДИГИТАЛНАТА БИБЛИОТЕКА ЧЕКА ПРВИ ПОСЕТИТЕЛИ

Употребна дозвола има, се чека софтвер на кирилица

Просториите, меѓу кои и сервер собата, кои се целосно по светските стандарди, се доопремени. Извршен е технички прием, а пристигнат е и скапиот скенер кој ќе овозможи оригиналите автентично да бидат пренесени во дигитална форма

Граѓаните ќе можат веќе деновиве да ги користат просториите на дигиталната библиотека во рамките на НУБ, но само за користење на археографските збирки од книжната и документите од европската дигитална библиотека. За увид во дигиталната форма на нашето книжевно богатство ќе мораат да почекаат уште извесно време до инсталирање на кириличен софтвер. Според директорот на Националната универзитетска библиотека, Миле Бошески, вчера од општинсите власти е добиена и употребната дозвола за објектот, по што и официјално ќе биде отворен за посетителите.
-Иако граѓаните во изминатиот период често прашуваа зошто вратите на дигиталната библиотека се уште се затворени објаснивме дека сакавме да ја добиеме потребната документација. Просториите, меѓу кои и сервер собата, кои се целосно по светските стандарди, во текот на изминатите неколку месеци се доопремени. Извршен е технички прием, а пристигнат е и скапиот скенер од Германија кој ќе овозможи оригиналите автентично да бидат пренесени во дигитална форма, објаснува Бошески.

Она што останува да се заврши е инсталирање на потребен софтвер за дигитализација во кириличен фонт, во согласност со стандардите и препораките на меѓународната асоцијација за заштита на културното наследство. Се бара документите да се обработат во оригинална форма и писмо.
-Ваков софтвер веќе се подготвува во Србија и Бугарија, така што веќе идната недела нашиот тим ќе го посети Белград за да можеме да добиеме увид и да видиме дали ќе преземеме готов или ќе правиме нов софтвер, додава Бошески.

Инаку, во рамките на стратегијата која ја подготви НУБ предвидено е да се опфати дигитализација на она што има статус на книжевно културно наследство, бидејќи е од интерес на светската јавност. Во оваа дигитална библиотека ќе бидат сместени археографски збирки, ориенталната, музичката, како и збирка на ретка периодика и се што е со статус на културно наследство. Во НУБ се чуваат и ракописи од 13 век.

Можност за користење на дигиталните ракописи истовремено ќе имаат 80 корисници. Тие ќе користат и речници, линкови со додатни информации и бази од комплетната библиографска база, од преку 400 илјади записи. Во новиот објект, обезбеден со видео надзор, веќе се префрлени археографските збирки, во посебно заштитени магацини.