Мал Ринг

Со задоцнување од околу една недела општината Центар ги достави потребните документи до Уставниот суд што беа потребни за да може да се оформи предметот за оценување на законитоста на деталниот урбанистички план за Малиот ринг, по претставката што ја поднесе градоначалникот Трифун Костовски. Општината го проби рокот од 15 дена што судот ѝ го даде за да достави одговор на барањето на Костовски. Таа требаше да даде мислење за тоа дали со усвојувањето на планот за Малиот ринг бил прекршен Законот за просторно и урбанистичко планирање.

НЕМАЛО КОЈ ДА ПОТПИШЕ

Виолета Аларова, градоначалничката на општината Центар, вчера рече дека испратиле одговор до судот, но не сакаше подетално да го коментира случајот.

- Документите што беа побарани се испратени. Сега останува на судот да одлучи дали има нешто спорно со планот или не. Причина за доцнењето беше тоа што немаше кој да ги потпише потребните документи - рече Аларова.

Пред два дена Југослав Миленковиќ, портпаролот на Уставниот суд, рече дека општинарите доцнеле веќе пет дена со доставувањето на одговорите.

- Ние им испративме дописи на кои тие требаше да одговорат до 25 септември. Но веќе почна нов месец, а ние сè уште не сме добиле одговор. Тие треба да го дадат нивното мислење за претставката на Костовски. Откако ќе го сторат тоа, судот уште веднаш ќе почне да го разгледува случајот и да провери дали има повреда на законите. Ако се утврди дека има, ќе донесеме привремена мерка забрана за градење. Судот има три месеци за да ја разгледа целата процедура - објасни Миленковиќ.

На тоа општинарите одговорија тогаш дека имало само еден работен ден во петте дена, колку што доцнеле, и дека немале доволно време за да ги разгледаат документите. Тие додадоа дека се надеваат оти судот нема да го оспори планот, затоа што постапки се воделе и за други детални урбанистички планови што ги усвоил општинскиот совет, но во ниту еден од нив не биле пронајдени неправилности.

НИШТО НОВО ЗА ИЗГРАДБАТА НА ЦРКВАТА

Една од најспорните точки поради кои се бараше Уставниот суд да го укине деталниот план за Малиот ринг беше тоа што со него се предвидува да се изгради православна црква на плоштадот „Македонија“, на просторот помеѓу стоковната куќа „Типо“ и ресторанот „Дал мет фу“. Оваа идеја потекна од Владата и од премиерот Никола Груевски, а кратко време по иницијативата општината Центар почна постапка за да го смени деталниот план и да впише градежна маркичка за храмот. Општинскиот совет на седницата што се одржа на 9 јули ги усвои измените во планот и ја вметна црквата во него.

Во меѓувреме Министерството за култура распиша меѓународен конкурс за идејно решение за изградба на храмот. Од пристигнатите 17 труда, на конкурсот беше доделена само трета награда, за решението на архитектите Искра Атанасова и Владимир Лековски, за што тие добија 150 илјади денари. Не се доделија првата и втората награда од 400 илјади, односно 250 илјади денари. Подоцна од Министерството соопштија дека третонаградениот труд е во согласност со каноните на православието и дека во него треба да се направат само мали измени. Црквата треба да биде висока 29 метри, а камбанаријата до 50 метри.

Но, и покрај тоа што е избрано идејно решение и што објектот е вметнат во деталниот урбанистички план, од министерството сè уште немаат информации кога би почнала изградбата.

- Сè уште немаме градежна дозвола и затоа не можам да кажам кога би почнале градежните работи. Кога ќе се спроведе таа процедура ќе нема никакви пречки и уште веднаш ќе почне да се гради - истакна Анита Јовановска, портпаролката на Министерството за култура.