Надземни и подземни пешачки премини

Елена Мачевска

Темни, неисчистени, запуштени и оставени на забот на времето се четирите подземни премини во Скопје. Изградени под многу фреквентни сообраќајници за да го направат безбедно поминувањето на пешаците, тие од година в година се повеќе се распаѓаат и се наоѓаат во се поочајна состојба. Граѓаните ги користат ретко зашто поради запуштеноста се чувствуваат непријатно да поминуваат низ нив, особено во вечерните часови кога и малкуте дуќанџии што работат таму ги затвораат своите продавници. Од постојните подземни премини, само два во одредена мера се оспособени за поминување низ нив. Едниот се наоѓа во близина на хотелот „Континентал“ во општина Гази Баба, а вториот се наоѓа во Аеродром, спроти ТЦ „Скопјанка“. Останатите два се на Јужен Булевар и во близина на Автосообраќајниот училиштен центар „Боро Петрушевски“. - Навечер не се осмелувам да поминам низ преминот затоа што тука многу пати досега се случувале грабежи и тепачки. Преку ден слободно поминувам затоа што има продавници, но навечер никогаш. Мислам дека надлежните треба да поработат на санирање на подвозниците, треба да постават и чувари кои ќе се грижат за безбедноста на сите што поминуваат низ нив - вели Марина од Автокоманда. Град Скопје и ЈП „Комунална хигиена“, кои се задолжени за одржување на функционалноста и на хигиената во премините, велат дека тие навремено и соодветно си ја извршуваат должноста. Сепак, како што тврдат, за лошиот изглед и за нехигиената се заслужни и несовесните граѓани, кои на кој било начин гледаат да го нагрдат изгледот, особено на преминот кој се наоѓа во близина на АСУЦ „Боро Петрушевски“. - Подземниот премин на булеварот Александар Македонски кај хотелот„Континентал“ е во функција. Вториот подземен премин на булеварот Александар Македонски, кај средните училишта, е во полоша состојбата затоа што, и покрај сите напори кои се вложуваат за негово одржување, неодговорни и несовесни граѓани постојано го нагрдуваат - велат од Одделението за односи со јавност на Град Скопје. Според нив, екипи на Град Скопје во последниот период двапати целосно го реконструирале јавното осветлување во подземните премини, биле поставени нови светилки и нови кабли, но, како што велат од Градот, по кратко време тие биле демолирани и откорнати. И од ЈП „Комунална хигиена“ тврдат дека редовно во текот на зимата се метат еднаш седмично, а од април, па до завршување на летната сезона, ќе почнат и со метење и со перење на премините. - Хигиената во премините што се наоѓаат во близина на хотелот „Континентал“ и тој кај ТЦ „Скопјанка“, успеваме во голема мера да ја одржиме. Тука ни се на помош и дуќанџиите, кои се грижат просторот пред нивните продавници да биде расчистен. Сепак, најголем проблем имаме во преминот кај АСУЦ „Боро Петрушевски“ - вели Катерина Лаова, портпарол на ЈП „Комунална хигиена“. Според неа, на тој простор досега, во соработка со општината и со градот, многупати интервенирале, но само по неколку дена, несовесните граѓани продолжуваат таму да го фрлаат ѓубрето и просторот да го користат како јавно веце.

Се планира изградба на нови

Покрај лошата состојба и слабата функционалност на веќе постојните подземни премини, градоначалникот Коце Трајановски во својата предизборна програма најави изградба на ваков премин кај Рекорд. Слична идеја имаат и во Општина Аеродром, кои предвиделе подземен или надземен премин спроти ТЦ „Бисер“.

http://vreme.com.mk/DesktopDefault.aspx?tabindex=1&tabid=1&EditionID=1945&ArticleID=134038

Дали некој знае дали некогаш се користел подземниот премин кај јужен булевар затоа што немам секавање за него дека бил во функција, и на терен колку што можам да забележам, е дека постои само еден влез-излез од подземниот премин од страната на радисон блу, додека од кај старата железничка не сум забележал скали за симнување или влез за подземниот премин?