Паркот со статуи се преселил од Калето до „Езерце“

Никој не знае зошто претседателскиот парк на цивилизациите со скулптури од историски личности од повеќе земји ќе се гради во Градскиот парк, наместо пред влезот на тврдината, како што беше првично предвидено

Во паркот на цивилизациите ќе има претставник и од некој наш деец, но се уште не се знае кој

Паркот на цивилизациите, кој по иницијатива на претседателот Ѓорге Иванов треба да го направат градските власти, наместо пред тврдината Кале, ќе се гради покрај езерцето во Градскиот парк, но никој не знае зошто е направена таа промена. Местото е замислено како парк со многу скулптури, кои би биле донација од странски држави и би претставувале славни личности од нивната историја. Првичната идеја беше тоа да биде европски парк, со дејци од земјите на Европската Унија, но подоцна тоа беше сменето.

Статуите на светските големци, според најновиот детален урбанистички план за јужниот дел од Градскиот парк, ќе се наоѓаат покрај езерцето, каналот со кој се полни со вода и ресторанот „Езерце“, поточно на потегот покрај тениските терени на клубот „Југ“. Општинарите од Центар велат дека градската управа, како носител на проектот, побарала паркот да биде впишан на таа локација. Но градските власти тврдат дека не знаеле за промената и дека одлуката веројатно ја донел кабинетот на претседателот. Од кабинетот на Иванов, пак, одговараат дека нивна е само иницијативата, а конкретната реализација им ја оставиле на локалните власти.

- Не знаеме кога ќе профункционира паркот. Треба да се заврши целата процедура во општината, да се усвои планот, за да можеме да испратиме иницијативи до сите претставништва и амбасади, за тие да одлучат која скулптура сакаат да ја постават. Во паркот на цивилизациите ќе има претставник и од некој наш деец, но сé уште не сме одлучиле кој - објаснија од кабинетот на претседателот Иванов.

Ако се исполнеше првичната замисла за паркот на цивилизациите, тој ќе се направеше веднаш до воениот отворен музеј на Кале, кој исто така е предвиден на таа локација, но нема најави кога ќе се прави. Но целиот тој простор и онака е затворен од пред шест месеци, бидејќи сé уште трае истрагата за тепачката околу изградбата на музеј-црквата на Калето. Беше најавено дека пристапот таму ќе биде забранет сé додека тој случај не се истурка до крај, а, според мислењата на некои правни експерти, за тоа може да бидат потребни и години.

Во меѓувреме, градската управа веќе распиша конкурс за идејно решение за постаментите на скулптурите, но оттаму не откриваат до каде е таа процедура.

Извор: http://www.novamakedonija.com.mk/NewsDetal.asp?vest=72011108104&id=14&prilog=0&setIzdanie=22335