Градски плоштад Гоце Делчев - Струмица

Струмица ќе има нов плоштад на 11 декември

Проектот чини околу 3,2 милиона евра што се обезбедени од општинскиот буџет

СТРУМИЦА - Плоштадот „Гоце Делчев“ во Струмица до 11 декември ќе добие нов лик. Контурите на овој дел во центарот на градот, кој е претворен во огромно градилиште, веќе се наѕираат, бидејќи најголем дел од градежните и занаетчиските работи веќе се завршени.

Новиот градски плоштад ќе зафаќа површина од 23.500 квадрати, од кои 8,5 илјади квадрати се под земјата каде што се градат сообраќајници и гаражи. На овој начин се решава сообраќајниот метеж во централното градско подрачје.

Градоначалникот Зоран Заев вели дека сите зафати на плоштадот се одвиваат според планираната динамика. „Со градежно-занаетчиските, армирачките и бетонските зафати на проектот ‘Градски плоштад‘ сме десетина дена понапред. Веќе сум сигурен дека до 11 декември, празникот на градот, Струмица ќе добие нов плоштад. Осумдесет отсто од градежните работи се завршени и во овие околу 2,5 месеци ќе се поставува урбана опрема - клупи, канти за отпад. Исто така, предвидено е хортикултурно уредување, набавка на возило за одржување на плоштадот и, секако, довршувањето на саат-кулата со трите часовници. Имаше мала неизвесност дали ќе најдеме доволно мајстори за поставување на гранитните плочки на површина од девет илјади квадратни метри. Но, и тоа го решивме“, рече Заев.

Изградбата на новиот плоштад во Струмица почна во април годинава. Проектот чини околу 3,2 милиони евра што се обезбедени од општинскиот буџет. (Е.П.)