Градски плоштад Гоце Делчев - Струмица

Продолжува приказната со уништување на новиот плоштад

Меѓу многуте верувања на човекот во постоење на разни натприродни суштества, спаѓа и верувањето во наречниците. Имено, народот верува дека на третата вечер од раѓањето на детето доаѓаат наречниците и му ја одредуваат судбината.

Ако веруваме така и на се ново што се раѓа, тогаш приказната за уништување на новиот плоштад во Струмица ќе продолжува. Ако се сеќавате, на само третата вечер од пуштањето на новиот плоштад, по 10-ти декември, “наречниците“ ги испрскаа гранитните плочки со моторно масло или по нашински со “уље“.

Е сега, според верувањето, кај новороденчињата наречниците се секогаш три жени или девојки и доаѓаат точно на полноќ, како што се вели во “глуво доба“. Ама кај нашиот ни плоштад тогаш се претпоставува дека дошле мажи, односно момчиња кои го испрскале гранитот со “уље“.

По четириесет дена од новото лето Господово, (синоќа) машките “наречници“ повторно се вратиле на плоштадот и денеска бевме сведоци дека “пак“, ама не ипрскале, сега истуриле “уље“. За да не биде исто како првиот пат од третата вечер, синоќа истуриле на помала површина, но пак, затоа си одкорнале две дрвца од горниот дел на плоштадот, зад грбот на Гоце Делчев. Гоце не ги приметил. Не приметил ни оти некој му шарал по таблата за струја.

Веројатно истите тие “наречници“ или можеби имаат конкуренција, пред една недела направиле и повеќе кружни траги од гуми на моторцикл по гранитот. Сакале да ги направат петте кругови на олимпискиот знак, но, премногу им се вртело во главата и пред нив се гледало како да се на Валандовско брдо.

Се верува дека наречниците не може да ги види никој освен во ретки случаи мајката на новороденото дете или патник кој тука случајно ќе се најде. Е мајката, во нашиот случај “таткото на овој проект“ не бил тука, во Америка е. Значи никој не ќе може да ги види “наречниците“?

Според напишаното од третата вечер, приказната ќе продолжува...

http://www.strumicanet.com

Општина Струмица заради осовременување и подобрување на животот на граѓаните, односно градењето општина по мерка на граѓаните, за 2010 година подготви ново сообраќајно решение за Плоштадот „Гоце Делчев“ и во рамките на Буџетот на општина Струмица, во Програмата Фа – Уредување на градежно земјиште (капитални трошоци) предвиде 240.000.000 денари средства потребни за реализација на овој капитален проект. Конечната реализација на плоштадот со сите составни елементи е 220.000.000.Реализацијата на новиот плоштад, кој се простира на две нивоа со вкупна површина од 23.485 метри квадратни, значи нов изглед на градот, ново пофункционално сообраќајно решение, нова пешачка зона, нов паркинг простор и олеснет транспорт на луѓе и стоки.

Долниот дел од плоштадот го дефинираат 5.183 метри квадратни, од кои 2.690 метри квадратни е современ паркинг простор со капацитет од 81 паркинг место од по 13.3 метри квадратни паркинг простор по возило и со две наплатни простории од по 28.6 метри квадратни.

Паркинг просторот е поплочен со бекатон плочки, а останатиот дел е асфалтирана модерна сообраќајница – Т раскрсница со регулиран сообраќај со помош на семафори.

Пристапот до Подземниот паркинг простор е регулиран со четири влезно-излезни отвори за пешаци од три страни на плоштадот.

Во подземниот дел од плоштадот има сместено модерни јавни тоалети.

Горниот дел од плоштадот се простира на површина од 18.302 метри квадратни и го дефинираат три дела:

• модерно шеталиште со каскадни летни тераси по леблебиџиската улица, поплочени со гранитни плочки.

• модерно шеталиште долж улица „Благој Јанков Мучето“, поплочено со гранитни плочи со убава структура.

• Плоштадно плато пред хотел Есперанто, НУЦУ Антон Панов, СОУ „Јане Сандански“ и Трговски центар „Стоковна Куќа“.

Платото е поплочено со гранитни плочи со убава структура. Целото е содржински опремено со Модерна урбана опрема, жардинерии со украсни садници и јарболи со знамиња на сите членки на ЕУ.

Двете спомен обележја: Споменик „Гоце Делчев“ и споменик „Струмичанка под маска“ го дефинираат Македонскиот опстој низ времето и спецификите на Струмица.

Горниот дел на Плоштадот е осветлен со Модерно улично осветлување со четири големи рефлекторски столбови и многу модерни канделабри. Пристапот до плоштадот е решен преку шест пешачки патеки од три страни плус градското корзо и леблебиџиската улица.

Истиот е ограден со модерни железни огради кои го потврдуваат безбедносниот аспект на граѓаните.

Со новиот плоштад на две нивоа се заокружува новиот Европски лик на центарот на Струмица кој ќе биде дел од секојдневието на сегашните и идните генерации струмичани.