Градски плоштад Гоце Делчев - Струмица

Пандев од струмичани пречекан како херој

Со овации и ракоплескања струмичани денеска како херој го пречекаа Горан Пандев или својот Гоче како што на галено го викаат.

Се собра и старо и младо за да ја поздрави најголемата македонска фудбалска ѕвезда, а тој скромен како и секогаш се смешкаше и трпеливо делеше топки и дресови на фудбалските клубови и училиштата од општината. Но имаше и за неговите фанови и обожавателите, кој ги фрлаше од балконот на општинската зграда.

„За мене ова е голема работа бидејки јас сум Македонец, горд сум што сум струмичанец и што вака ме пречекаа после овој успех. Сигурно дека овој успех не е само мој туку на цела македонска јавност, а посебно на струмичани“, рече Горан Пандев, фудбалер.

Дрес имаше и за Заев тој го облече и најави дека на новиот плоштад во Струмица во чест на Пандев ќе биде поставена позлатена ѕвезда, а на влезот во Струмица ќе биде поставен билборд на кој ќе пишува, додредојдовте во градот на Пандев.

„На централната поставеност на самиот плоштад ќе биде вградена позлатена ѕвезда со името на Горан Пандев и 2010-та година, како едно трајно одбележје за сегашните но пред се за идните генерации за оваа афирмативна 2010-та година не само за Горан, не само за Струмица но пред се и за Република Македонија“, рече Зоран Заев, градоначалник на Струмица.

До 15-ти јули Пандев со сопругата и синот Филипо, ќе биде на заслужен одмор во Струмица.