Вардариште ќе стане голем парк

По безбројните поплаки да се најде решение за пожарите што горат на старата депонија Вардариште и ги трујат жителите на Аеродром и на Ново Лисиче, Градот најавува раззеленување на овој простор и негово претворање во парк. Рекултивацијата на просторот се најавува во две фази во наредните две години, се вели во Програмата што неделава ќе се најде на дневен ред на Советот на Скопје. Цената е заокружена на 130.000 евра, а програмата ќе ја спроведува секторот за животна средина при Градот.

Пожарите се секојдневие во летниот период, една деценија наназад. И самата најава за зазеленување на оваа локација не е нова вест, туку датира од самото затворање на Вардариште за депонирање комунален отпад во 1996 година. Најавата си остана, пожарите исто така, а сето тоа поради незаинтересираноста на градската власт за каква било конкретна активност околу наоѓање решение за високите количини на гас. Сега се најавува истата прикаска, особено актуелна во двата мандата на градоначалникот Ристо Пенов.

Со проектот е предвидено да се елиминира опасноста од евентуални пожари и експлозии, предизвикани од присуството на депонскиот гас во телото на депонијата, но и отстранување на други загадувачи на животната средина.

Во Програмата за ревитализација на Вардариште се вели дека ќе се врши пречистување на подземните води и намалување на загаденоста на бунарските води во Маџари, отстранување на непријатниот мирис од депонираниот отпад и создавање уредена градска парковска површина која ќе им обезбеди пријатен престој и можност за рекреација на посетителите.

Она што е вистински проблем, како за Градот, така и за напојувањето со струја на овие големи населби, е фактот дека во средишниот дел на депонијата се наоѓа и високонапонски далновод. Според стручни лица, доколку гасот предизвика експлозија и со неа биде зафатен далноводот, тогаш не само што ќе останат неколку населби без струја туку и материјалната штета ќе биде огромна.

Мал дел од Вардариште, околу 5 хектари, од вкупно 41,7 хектар, ќе се огради и се предвидува да остане во сопственост на „Комунална хигиена“, односно во функција на Стационарот за бездомни животни, како и за претоварната станица за комунален отпад. Воедно, се вели во Програмата, во план е и уредување на рециклажен двор за пластичен отпад, хартија и амбалажа.

Двете фази од двегодишната Програма опфаќаат изработка на елаборат за заштита на животната средина за оценка на влијанието на депонијата врз животната средина, изградба на систем за зафаќањето и пречистувањето на подземните води и гасот од телото на депонијата, покривање, израмнување и рекултивација на завршниот покривен слој и на крајот - изградба на пристапни и внатрешни патишта. Исто така, ќе се изведат електрични, водоводни и канализациски инсталации, како и хидрантска мрежа и за полевање на зеленилото, а ќе се преземат потребните мерки за заштита од високонапонскиот електроснабдителен вод.

Депонијата Вардариште се наоѓа на левиот брег на реката Вардар, источно од центарот на Скопје, поточно покрај заштитниот насип на реката, оградата на поранешен МЗТ и одводниот канал на поранешна Железарница. Локалитетот Вардариште до 1965 година интензивно бил користен како зајмиште за чакал и за песок на градежната оператива кога Скопје се обновувало од катастрофалниот земјотрес во 1963 година.

Депонирањето на неселектиран комунален и сличен отпад на Вардариште се вршело до крајот на 1995 и почетокот на 1996 година.

По ова, целокупниот комунален отпад од Скопје се депонира во депонијата Дрисла. Карактеристично за депонијата Вардариште е фактот што пред да се почне со депонирање на комунален и сличен отпад, не е извршена никаква подготовка на подлогата. Со текот на експлоатацијата на ваквата депонија, како последица на неколку пожари, биле поставени цевки за одделување депониски гас.

Градоначалникот на Општина Кисела Вода, г-нот Марјан Ѓорчев и амбасадорот на Република Полска во Република Македонија, Н.Е. Карол Бахура и министерот за култура на Република Македонија, г-ѓата Елизабета Канческа Милевска, на 29.09.2010 година (Среда) во 11:00 часот, свечено го пуштија во употреба “Паркот на Фредерик Шопен”, кој се наоѓа зад основното училиште “Невена Георгиева – Дуња” во Општина Кисела Вода.

Изградбата на паркот е дел од проектот “Одбележување на 200 години од раѓањето на полскиот композитор, великанот на музиката Фредерик Шопен”, за унапредување на соработката во областа на културата, музиката и уметноста помеѓу полската и македонската култура и почитување на начелата на хуманизмот, општо цивилизациските и европските вредности. Проектот е продолжение на одличната соработка помеѓу Општина Кисела Вода и Амбасадата на Република Полска во Р.М., која започна на почетокот на оваа година со поставувањето на плакета на Фредерик Шопен, на истоимената улица во Општина Кисела Вода.

            “Изградбата на паркот има мултифункционална димензија, бидејќи покрај афирмативната улога на музичката уметност, уште еднаш ќе го потврди духот на одличната соработка помеѓу македонската и полската нација, помеѓу македонската и полската уметност.” – порача градоначалникот Ѓорчев во свеченото обраќање.

“Фредерик Шопен - Варшавјанин по род, по срце Полјак                     и граѓанин на светот по талент, претставува одличен пример на европската култура, за светската култура. Поставувајќи ја бистата на овој композитор, во паркот кој го носи неговото име, истакнуваме не само 200 годишнината од раѓањето на композиторот, туку пред се европеизмот на ова место, европеизмот на Општина Кисела Вода, европеизмот на Скопје, европеизмот на цела Република Македонија” – изјави амбасадорот Бахура.

Министерот за култура, г-ѓата Елизабета Канческа Милеска, ја поздрави одличната соработка помеѓу двете држави, Република Македонија и Република Полска, како на централно, така и на локално ниво. - “Потврда за тоа е и овој проект за изградба на овој прекрасен парк во Општина Кисела Вода, чиј жител сум и јас” – меѓудругото, изјави Канческа Милеска.

Бистата на Фредерик Шопен беше осветена од страна на скопскиот бискуп, д-р Киро Стојанов, а се отсвиреа и неколку партитури од музиката на Фредерик Шопен, во изведба на музичкото дуо “Талија”.

Паркот на Шопен е хортикултурно уреден, поставена е нова урбана опрема, детски реквизити, изградена е импознантна фонтана која во вечерните часови е осветлена во повеќе бои, а се изгради и мултифункционална бина. Во состав на паркот е поставена, прва во Република Македонија, биста на великанот на Полската и светската музика, Фредерик Шопен. Со естетското и хортикултурно уредување на паркот, со создавање на функционално место каде ќе се одржуваат културно-уметнички манифестации во иднина, на граѓаните ќе им се пружи уште едно урбано катче, каде ќе можат да се релаксираат и да го поминуваат слободното време, 24 часа во денот.